Еңбек және халықты әлеуметтік қорғау министрлігі «Жұмыспен қамту - 2020 бағдарламасы» 2011 жылғы жұмысын қорытындылады
1 ақпанда Қазақстан Республикасының Еңбек және халықты әлеуметтік қорғау министрлігінде 2011 жылдағы жұмыстарды қорытындылау мен «Әлеуметтік-экономикалық жаңғырту – Қазақстан дамуының басты бағыты» атты Елбасының Қазақстан халқына арнаған Жолдауын назарға ала отырып, 2012 жылдағы міндеттерді анықтауға арналған алқа мәжілісі өтті.
«Жұмыспен қамту проблемалары жөніндегі ақпараттық-талдау орталығы» АҚ президенті Алма Дәуітова «Еңбек» және «Жұмыспен қамту 2020 бағдарламасы» интернет-ресурстар презентациясында сөз сөйледі.
Алқа мәжілісі Премьер-министрдің орынбасары Ербол Орынбаевтың қатысуымен өтті. 2011 жылы халықты жұмыспен қамту және қазақстандықтарды әл-ауқат деңгейін жақсартуды қамтамасыз ету мәселелеріне ерекше назар аударылды.
«Соңғы жылдардағы экономикалық өсім мен белсенді әлеуметтік саясат халықтың өмір сүру деңгейінің айтарлықтай жақсаруына мүмкіндік берді», - деп атап өтті алқа мәжілісінде Еңбек және халықты әлеуметтік қорғау министрі Гүлшара Әбдіқалықова.
«Жұмыспен қамту-2020» бағдарламасы халықты әлеуметтік қамтамасыз етуде үлкен рөл атқарады. Бағдарлама ілкі жоба ретінде іске қосылған жыл жемісті өтті. Елбасының тапсырмасы бойынша жұмыспен қамту бағдарламасын жүзеге асыруда белсенді сатыға көшу керек», - деді алқа мәжілісінің отырысында Премьер-министрдің орынбасары Ербол Орынбаев.