Қараша айында ЭЕБ-да қазан айына қарағанда 16 мың бос жұмыс орнына аз орналастырылған

«Еңбек ресурстарын дамыту орталығы» АҚ-ның (бұдан әрі – ЕРДО) деректері бойынша қараша айында Электрондық еңбек биржасында 77 мың бос жұмыс орны және 39 мың түйіндеме орналастырылған, оның ішінде біліктілікті талап ететін санатқа 50 мың бос жұмыс орны және 25 мың түйіндеме жатқызылған.

Ағымдағы жылғы қазан айымен салыстырғанда қараша айында бос орындардың жалпы саны 17%-ға, біліктілікті талап ететін бос орындар саны – 23%-ға, ал түйіндемелер саны 28%-ға қысқарған.

«Қараша айында бос жұмыс орындарының саны бойынша жұмыс берушілердің ең көп ұсыныстары Алматы және Нұр-Сұлтан қалаларында түсті – тиісінше 13,5 мың және 6,9 мың. Бұл экономикалық белсенділіктің біршама қалпына келуін көрсетуі мүмкін. Сондай-ақ, Түркістан (6,3 мың), Алматы (6,1 мың) және Қарағанды (5,9 мың) облыстарында орналастырылған бос орындар санының көптігін атап өткен жөн», – деп хабарлады ЕРДО Болжамдау департаментінің директоры Дмитрий Шумеков.

Білікті еңбекті қажет ететін бос жұмыс орындары бойынша Алматы (9,4 мың) және Нұр-Сұлтан (5,7 мың) қалалары, сондай-ақ Қарағанды (4,4 мың), Шығыс Қазақстан (3,1 мың) және Қостанай (2,8 мың) облыстары көш бастап тұр.

Дмитрий Шумековтың деректері бойынша, өткен аймен салыстырғанда Алматыда бос жұмыс орындарының саны 2 есеге жуық, Маңғыстау облысында – 12%-ға, Атырау облысында 6%-ға және Павлодар облысында 1%-ға өскен. Бұл ретте білікті еңбекті талап ететін бос жұмыс орындарының өсімі Алматы қаласында (73% - ға) және Атырау облысында (17% - ға) ғана орын алған, ал қалған өңірлерде білікті қызметкерлерге деген қажеттіліктің қысқаруы тіркелді.

Орналастырылған түйіндемелерге қатысты талдаушы олардың ең көп саны қараша айында Түркістан, Қызылорда және Алматы облыстарына, сондай-ақ Алматы қаласына келгенін атап өтті. Бұл ретте қазан айымен салыстырғанда түйіндемелер санының өсуі тек Алматы қаласында (2,4 есе) байқалды, ал қалған өңірлерде жұмыс іздеушілер белсенділігінің жалпы төмендеуі байқалады.

«Қараша айында дүкендердегі сатушылар, кең профильді офис қызметкерлері, күтім бойынша орта медициналық қызметкерлер, сондай-ақ құрылысшы-монтажшылар мен орта мектеп мұғалімдері ең көп сұранысқа ие мамандықтар болды», – деп түйіндеді Дмитрий Шумеков.

Сонымен қатар, сарапшы өңірлер бойынша кадрларға сұраныс туралы айтып берді. Мәселен, дүкен сатушылары Алматы қаласында, Ақтөбе және Қызылорда облыстарында, құрылысшы-монтажшылар Қостанай және Маңғыстау облыстарында, дәнекерлеушілер мен газ кесушілер Шығыс Қазақстан облысы мен Нұр-Сұлтан қаласында сұранысқа ие. Жамбыл облысында орта мектеп мұғалімдері, Атырау облысында – техниктер-электриктер, Түркістан облысында – саз бен керамика бойынша қолөнершілер сұранысқа ие.

Қарағанды облысында күзетшілер, Алматы облысында – әлеуметтік жұмысты ұйымдастыру және жүргізу саласындағы қызметшілер, Солтүстік Қазақстан облысында кең бейінді хатшылар қажет. Павлодар облысында бухгалтерлік операциялар мен есеп бойынша қызметшілер, Батыс Қазақстан облысында бойлер мен бу машиналарының операторлары, Шымкент қаласында мата бойынша реставраторлар, Ақмола облысында инженер – механиктер және жоғары вольтты желілер жөніндегі жұмысшылар ең қажетті болып табылады.

 

08.12.2020
60