ЕЭБ-те жаңартылатын энергия көздері туралы жеке бөлім бар

Электрондық еңбек биржасының порталында (бұдан әрі – ЕЭБ) Қазақстанда жаңартылатын энергия көздерін дамыту және осы саладағы жұмыс перспективалары туралы ақпарат беретін жаңа бөлім пайда болды. Алдағы уақытта бөлімде «жасыл экономика» секторына лайықты бос жұмыс орындары мен түйіндемелерді орналастыру жоспарлануда.

Жаңартылатын энергия көздері секторын (бұдан әрі – ЖЭК) дамыту, сондай-ақ осы бағытта әйелдерге тең жағдайлар мен мүмкіндіктер жасау үшін Еуропалық қайта құру және даму банкінің қолдауымен Қазақстанда тиісті бағдарлама іске қосылды. Ол көптеген жобалар мен іс-шараларды жүзеге асыруды қамтиды. Осылайша, жас мамандарға тәлімгерлік жүйесі енгізіліп, алынған академиялық білімдерін маман қызметкерлердің жетекшілігімен ЖЭК жұмыс істеп тұрған нысандарында қолдануға мүмкіндіктер ашылды, халықаралық тәжірибе негізінде жастарға кәсіптік бағдар беру жүйесі енгізілуде.

«Біз жұртшылыққа Электрондық еңбек биржасында жаңартылатын энергия секторындағы мүмкіндіктер туралы арнайы бетті ұсынуға қуаныштымыз. Жаңа кәсіптер мен құзыреттер атласында атап өтілгендей, алдағы жылдарда Қазақстанға осы саланың мамандары көбірек қажет болады. Елде жаңартылатын энергия көздеріне арналған құрамдас бөліктерді жобалау, өндіру, сондай-ақ оларды салу, техникалық қызмет көрсету және басқарумен байланысты кәсіптер дамитын болады. Саланың дамуы тұрақты және инклюзивті жолмен жүруі керек, оны біз ұсынылған бет арқылы алға жылжытуға тырыстық», - деді «Еңбек ресурстарын дамыту орталығы» АҚ президенті Дәулет Арғандықов.

ЖЭК секторында жұмысқа тартылуы мүмкін жастарды қамтуды кеңейту, оларға мансаптық келешегін айқын көрсету, жұмыс беруші мамандарға қызығушылық танытатын дағдылар туралы хабардар ету мақсатында ЕЭБ бойынша арнайы бөлім құрылды.

Ол Еуропалық қайта құру және даму банкі бағдарламасының қолдауымен «Еңбек ресурстарын дамыту орталығы» АҚ мен Ernst & Young компаниялар тобының бірлескен жұмысы аясында, сондай-ақ Жасыл климаттық қормен бірлесіп жүзеге асырылды.