Сенаторлар әлеуметтік-еңбек саласының ақпараттық жүйелерімен танысты

ҚР Парламенті Сенатының депутаттары «Еңбек ресурстарын дамыту орталығы» АҚ-да көшпелі кездесу өткізді, оның барысында әлеуметтік-еңбек саласының ақпараттық жүйелері таныстырылды.
Бұл кездесу «Мектепке дейінгі білім берудің қолжетімділігін арттыру, сапалы орта білім беруді қамтамасыз ету, жоғары және кәсіптік-техникалық білім берудің даму үрдісі» тақырыбында дөңгелек үстелге дайындық аясында ұйымдастырылды.
Іс-шараға ҚР Парламенті Сенатының Әлеуметтік-мәдени даму және ғылым комитетінің мүшелері: Нұртөре Жүсіп, Ақмарал Әлназарова, Талғат Жүнісов, Ләззат Қалтаева, Айгүл Қапбарова, Алтынбек Нухұлы, Руслан Рүстемов және басқалары қатысты.
Кездесу басында ҚР Еңбек және халықты әлеуметтік қорғау вице-министрі Ербол Оспанов депутаттарды әлеуметтік-еңбек саласының ақпараттық жүйелері туралы хабардар етті. Qlik Sense талдау бизнес платформасы, «Еңбек ресурстарының тізілімі», «ЖОО түлектерін жұмысқа орналастыру» кейстері және Отбасының цифрлық картасы толығырақ қарастырылды. «Электрондық еңбек биржасы» цифрлық экожүйесіне ерекше назар аударылды.
«Электрондық еңбек биржасының» негізгі элементі еnbek.kz жұмысқа орналастыру бойынша бірыңғай цифрлық алаң болып табылады, онда азаматтар кәсіптер, дағдылар және еңбек жағдайлары бойынша қолайлы бос жұмыс орындарын, жұмыс берушілер олардың талаптарына сәйкес келетін қызметкерлерді таба алады. Армения, Беларусь, Қырғызстан және Ресейдің ұлттық ақпараттық жүйелеріне қол жеткізе алатын «Шекарасыз жұмыс» бірыңғай іздеу жүйесінің арқасында Қазақстанда ғана емес, ЕАЭО елдерінде де жұмыс немесе қызметкер табуға болады.
Сондай ақ экожүйеге SKILLS.еnbek.kz онлайн оқыту платформасы – халық үшін сұранысқа ие дағдылар бойынша курстар маркетплейсі және BUSINESS.еnbek.kz кәсіпкерлік бастамаларды қолдау порталы кіреді.
Экожүйенің тағы бір элементі – HR.enbek.kz еңбек ресурстары порталы, оны 336 мыңға жуық жұмыс беруші пайдаланады. Портал еңбек шарттарын тіркеу арқылы жалдамалы жұмыскерлердің еңбек жолын цифрлық есепке алуды жүзеге асырады, сол арқылы қызметкерлердің электрондық еңбек кітапшаларын қалыптастырады. Мемлекеттік органдардың ақпараттық жүйелерімен интеграцияның арқасында жұмысқа орналасу кезінде қажетсіз құжаттар мен анықтамаларды жинамай, әлеуетті қызметкерлердің жеке істерін автоматты түрде қалыптастыру мүмкін болады.
Іс-шара қорытындысы бойынша кездесуге қатысушылар өздерін қызықтыратын жұмыс аспектілері мен ақпараттық жүйелерді дамыту перспективаларын талқылады. ҚР Парламенті Сенатының депутаттары әлеуметтік-еңбек саласын цифрландырудың жоғары деңгейін атап өтті.