ҚР Денсаулық сақтау және әлеуметтік даму министрлігінің кеңейтілген алқа мәжілісі

18.02.2016ж. ҚР Денсаулық сақтау және әлеуметтік даму министрлігінің 2015 жылғы атқарылған жұмыстар нәтижесі мен 2016 жылдағы алда тұрған міндеттері туралы кеңейтілген алқа мәжілісі өтті.

Отырысқа ҚР Премьер-Министрінің орынбасары Дариға Назарбаева, ҚР Президент Әкімшілігінің, ҚР Премьер-Министрі Кеңсесінің өкілдері, Астана және Алматы қалалары, облыс әкімдерінің орынбасарлары, ҚР ДСӘДМ құрылымдық бөлімшелерінің басшылары қатысты.  

ҚР Денсаулық сақтау және әлеуметтік даму Министрі Тамара Дүйсенова алқа мәжілісін аша отырып, 2015 жылы Елбасы айқындаған Ұлт жоспары – бес институционалдық реформаны жүзеге асыру жөніндегі «100 нақты қадамды» жүзеге асыру шараларының заңнамалық және институционалдық негіздері құрылғанын еске салды.

Ұлт жоспарына сәйкес, 2015 жылы жаңа Еңбек кодексі, міндетті әлеуметтік медициналық сақтандыруды енгізу туралы, атаулы әлеуметтік көмекті жаңа форматта көрсету туралы, халықтың көші-қон мәселелерін реттеудегі жаңа тәсілдер туралы заңдар қабылданды. «Халықты жұмыспен қамту туралы» Заңнама әзірленді. Барлық құжаттар бір жағынан, халықты әлеуметтік қолдаудың кешенді және атаулы жүйесін құруға, екінші жағынан, еліміздегі инвестициялық климатты жақсартуға бағытталды.

Министр 2016 жылы ҚР ДСӘДМ әлеуметтік-еңбек саласындағы жұмысының басты бағыты – халықты жұмыспен қамту мен жұмыс орындарын сақтау болып табылатынын хабарлады.

Сонымен қатар, Тамара Дүйсенова Мемлекет басшысының 2015 жылғы 30 қарашадағы «Қазақстан жаңа жаһандық нақты ахуалда: өсім, реформалар, даму» атты Қазақстан халқына Жолдауындағы жұмыссыздыққа жол бермеу бойынша берілген тапсырмасын орындау мақсатында ҚР ДСӘДМ мамандары «ЖҚЖК 2020» бағдарламасын жандандыру бойынша жұмыс жүргізгенін мәлімдеді.

Сондай-ақ, алқа мәжілісінің кеңейтілген отырысы барысында «Жұмыспен қамту проблемалары жөніндегі ақпараттық-талдау орталығы» АҚ «Жұмыс» ақпараттық порталын (www.enbek.kz) таныстырды.

Порталдың басты мақсаты: Республика бойынша жұмыс және жұмыскерлерді іздеу, бос жұмыс орындары туралы ақпараттар жиыны, оның ішінде жергілікті жұмыспен қамту органдарына жұмыс берушілер мәлімдеген, Порталда өз еркімен жариялаған, еліміздегі жеке жұмыспен қамту агенттіктері жариялаған бос жұмыс орындары. «Жұмыс» ақпараттық порталында 18 мыңнан астам жұмыс берушілердің бос жұмыс орындары енгізілген және ҚР бойынша 50 мыңнан шамасында жұмыс іздеушілердің түйіндемелері орналастырылған.

Сөз соңында Тамара Дүйсенова ҚР ДСӘДМ қызметінің барлық бағыттары бойынша жұмыс 2016 жылы Елбасы мен ҚР Үкіметі тапсырмасының негізінде жалғастырылатынын хабарлады.

19.02.2016
215