KIOSH 2016: Астанада VI Қазақстандық халықаралық конференциясы мен Еңбекті қорғау және өндіріс қауіпсіздігі жөніндегі «KIOSH-2016» көрмесі өтті

ҚР Денсаулық сақтау және әлеуметтік даму министрлігінің қолдауымен Дүниежүзілік еңбекті қорғау күніне орай VI Қазақстандық халықаралық конференциясы мен Еңбекті қорғау және өндіріс қауіпсіздігі жөніндегі «KIOSH-2016» көрмесі өтті.

Конференцияның мақсаты – кәсіпорындарда жарақаттың азаюына, өндіріс нысандарында апат қаупін төмендетуге, қоғамға және қоршаған ортаға тигізетін шығынды азайтуға, кәсіби аурулардың алдын-алуға, еңбек өнімділігін арттыруға бағытталған мемлекеттік органдардың, бизнестің және қоғамдық ұйымдардың күш-жігерін біріктіру.

Іс-шараға ҚР Денсаулық сақтау және әлеуметтік даму министрлігінің, АҚ «Жұмыспен қамту жөніндегі ақпараттық-талдау орталығы» ҚР Кәсіподақтар федерациясының, «Атамекен» ҚР Ұлттық кәсіпкерлер палатасының, Дүниежүзілік денсаулық сақтау ұйымының, Халықаралық еңбек ұйымының, Ресей, Монғолия, Қырғызстан еңбек инспекцияларының өкілдері және т.б. қатысты.

ҚР Денсаулық сақтау және әлеуметтік даму Министрі Тамара Дүйсенова Үкімет пен ҚР ДСӘДМ жұмыс орындарында қауіпсіз әрі денсаулыққа зияны жоқ еңбек жағдайларын жасауға айырықша мән беріп отырғанын атап айтты. Өйткені, бұл – үйлесімді еңбек қатынастары мен еңбектің өнімділігін арттыруға арналған базалық негіз болып табылады.

Елімізде әрбір бесінші адам қауіпті әрі денсаулыққа зиян өндірісте жұмыс істейді. Өткен жылы жүргізілген тексеріс барысында осындай мәліметтер анықталды. Бұл туралы Kiosh-2016 халықаралық конференциясының ашылу рәсімінде еліміздің Денсаулық сақтау және әлеуметтік даму министрі Тамара Дүйсенова хабарлады. Оның айтуынша, өндірістік жарақат көрсеткіштері бойынша Қарағанды, Шығыс Қазақстан, Қостанай, Павлодар мен Алматы өңірлері көш бастап тұр. Шара аясында жұмысшылардың жағдайын жақсартып, қауіпсіздігін қамтамасыз ету мәселесі кеңінен талқыланды.

Сонымен қатар, форумда саладағы ең үздік маман атағын анықтайтын «Қорған» ұлттық салалық конкурсының қорытындысы және республиканың жұмыс берушілерінің арасында еңбектің қауіпсіздігі мен қорғалуы бойынша «Сенім» конкурсының нәтижесі белгілі болады.

Естеріңізге сала кетейік, «KIOSH» көрмесі – тәжірибе алмасу және өндірістік қауіпсіздік саласында соңғы жылдары жеткен жетістіктерімен бөлісуге арналған Қазақстандағы жалғыз арнайы алаң. Көрмеде құрылыста, көлікте, энергетикада, химиялық өндіріс, тау-металлургиялық, мұнай-газ салаларында қауіпсіздікті қамтамасыз етуге арналған  өнімдер мен қызметтер толық ұсынылған.

Жұмыскерлердің құқықтарын қорғау, олардың әлеуметтік қорғауы мен еңбек қауіпсіздігін арттыру мәселелеріне назар аудару мақсатында Халықаралық еңбек ұйымы 28 сәуірді Дүниежүзілік еңбекті қорғау күні етіп жариялаған болатын.

 

 

29.04.2016
166