«ЕРДО» АҚ Президенті Дәулет Арғындықов электрондық еңбек биржасының артықшылықтары мен функциялары жөнінде баяндады

Қазақстанда Елбасы Н.Ә. Назарбаевтың тапсырмасы бойынша бос жұмыс орны мен қызметкерлерді іздеуге арналған бірыңғай онлайн-платформа – Электрондық еңбек биржасы құрылды. Жаңа онлайн-платформаның артықшылықтары және оның функциялары жөнінде «Еңбек ресурстарын дамыту орталығы» АҚ президенті Дәулет Арғындықов NUR.KZ порталына тарқатып айтып берді.

- Дәулет Рашидұлы, Электрондық еңбек биржасы не үшін құрылды? 

- Электрондық еңбек биржасы – бос жұмыс орындары және түйіндемелерді ақысыз негізде жариялап, жұмысқа орналасуға мүмкіндік беретін бірыңғай цифрлік алаң. Электрондық биржа www.enbek.kz интернет-ресурсының базасында қызмет жасайды. Бұған дейін мекемелер штаттағы жұмысшылар санын кеңейту немесе қысқарту жоспарлары жөнінде мемлекетке хабарлап отыру үшін Халықты жұмыспен қамту орталығының көмегіне жүгінуі қажет болатын. Енді бұл жұмыс портал арқылы жүргізілетіндіктен, бизнестің қызметін жеңілдетуге және әкімшілік кедергілерді алып тастауға мүмкіндік пайда болып отыр. Сондай-ақ, электрондық еңбек биржасы бос жұмыс орындары мен жұмыс іздеушілер туралы бүкіл деректі бір сайт ішінде біріктіруге көмектеседі.

- Жұмыс іздеуге көмектесетін басқа ресурстардан Электрондық биржаның айырмашылығы неде?

- Біздің қызметтер жеке деректерді қорғау туралы заңнаманың бүкіл талаптарын сақтай отырып, жұмыс іздеушінің жеке келісім беруімен оған қатысты жеке деректерді тексеруге мүмкіндік береді. Халықты жұмыспен қамту орталықтары осы портал арқылы қызметкерлерді іздеу бойынша қызметтерді атқара алады. Компаниялар жарияланған бос жұмыс орындарына қатысты жұмыс іздеушілердің түйіндемелерін өздерінің жеке кабинеттерінде ала алады. Бұл түйіндемелерді алдын ала іріктеумен осы орталықтар айналысатын болады. Рекрутингтік агенттіктер өздеріне қажетті жұмыс іздеушілер туралы деректерді биржадан жүктеп ала алады. Мемлекет жағынан қарастыратын болсақ, жұмысқа орналасқысы келетін тұлғалардың мүддесі көбірек қорғалып отыр. Қазіргі таңда біз жұмысқа орналастырумен айналысатын 24 жекеменшік агенттікпен ынтымақтасып отырмыз. Жұмыс іздеушілер немесе жұмыс берушілер де портал арқылы осы компанияларды тауып, олардың көмегіне жүгінуіне болады, алайда мұндай қызметтердің бағасы жөнінде өзара келісуі тиіс болады.

- Портал қазір қандай режімде жұмыс жасап жатыр? Қазіргі таңда қолданушыларға қанда функционал қолжетімді?

- Электрондық еңбек биржасы іске қосылып қойған, қазір оған жұмыспен қамту орталықтарының барлығы қосылып жатыр. Жұмыс берушілер порталда бос жұмыс орындары туралы ақпаратты жариялап, жұмыс іздеп жүрген тұлғалардың дерек базасын қолдану арқылы олардың шарттарына сәйкес келетін жұмыс іздеушілерді таңдауға, сұхбаттасуға шақыруға және бос жұмыс орындарына қызығушылық білдіргендермен онлайн режімде байланыс орнатуға мүмкіндігі бар. Ал жұмыс іздеушілер түйіндемелерді жариялауға, бос жұмыс орындарын автоматты түрде іріктеуге, қажетті жұмыс орнына өз қызығушылығын білдіруге, сұхбаттасуға шақырту алуға, жұмыс берушілерден жұмысқа орналастыру туралы хабарламаларды алуға мүмкіндігі бар.

- Ғаламтор соншалықты кең таралмаған ауылдық округтардың, аудандардың тұрғындары үшін бұл ресрурс қаншалықты пайдалы болмақ?

- Ғаламторға қосылмаған азаматтар Жұмыспен қамту орталықтары арқылы өз деректерін орналастыра алады, ал бұл орталықтар қызмет жасамайтын аудандардың тұрғындары ауылдық округтардың әкімдері арқылы осы мүмкіндікке қол жеткізе алады. «Е-Халық» жүйесі ендірілген соң, ауыл әкімдерінің барлығы порталдың бірыңғай базасына қосылады, сондықтан әрбір азаматта осы порталға шығуға мүмкіндік болады.

- Мұндай алаңның табысты болу-болмауы көбінесе деректердің көлеміне байланысты, өйткені алаң бетінде түйіндемелер мен бос жұмыс орындар саны көп жарияланған сайын, жұмысты немесе жұмыс іздеушіні табу мүмкіндігі де арта түсетіні сөзсіз. Ресурстың қазіргі көрсеткіштері қандай: қанша қолданушысы бар, қанша түйіндеме, бос жұмыс орындары жарияланған? Порталдың базасы қандай қарқынмен өсіп жатыр?

- Бүгінгі күні порталда 30 000-нан аса бос жұмыс орны және 9 000-нан аса түйіндеме жарияланған, оның үстіне база күнде толығып отырады. Қазірдің өзінде онлайн-режімде market.kz және zarplata.kz сынды интернет-алаңдармен деректер алмасып отырамыз.

- Электрондық еңбек биржасы арқылы жалақысы жоғары жұмысты табу шынымен де мүмкін бе? Әлде ресурс, бірінші кезекте, әлеуметтік тұрғыдан аз қорғалған халық тобына, жұмыссыздарға арналған ба?

- Электрондық еңбек биржасы азаматтың әлеуметтік жағдайына қарамастан әрбір адамға жұмысқа орналасуға көмектеседі. Жалақысы жоғары жұмыс мамандарға, басшыларға және мамандығы бар тұлғаларға ұсынылады. Бүгінгі күні порталда жалақысы 200 000 теңгеден басталатын 440 бос жұмыс орыны жарияланған.  

- Базаға қандай ақпарат түседі: жұмыс іздеушілер мен жұмыс берушілер порталда өздері тіркеле ме әлде бұған қандай да бір орталықтандырылған қызмет жауап бере ме? Порталда тіркелу үшін не істеу қажет?

- Электрондық еңбек биржасындағы бұл үдерістер онлайн жүзінде жүргізіледі. Әрбір жұмыс беруші мен жұмыс іздеуші порталда өз бетінше тіркеліп, ақпарат жариялай алады немесе Халықты жұмыспен қамту орталығының көмегіне жүгінсе болады. Порталда тіркелу үшін тіркеу үлгісін толтырып, электрондық пошта мекенжайын растау қажет. Жұмыс берушілер өз мекемесі туралы ақпаратты растау үшін электрондық цифрлік қолтаңбаны қолдануы тиіс немесе Халықты жұмыспен қамту орталығына жолығуы тиіс.

- Ресурс арқылы жұмыс тапқан азаматтардың статистикасы жүргізіле ме?

- Электрондық еңбек биржасы іске қосылғалы бері біз портал арқылы жұмысқа орналасқандардың есебін жүргізіп келеміз. Бұл ақпаратты жұмысқа қызығушылық білдіру және шақырту жіберу сервисі арқылы жұмыс іздеушімен тікелей байланысқа түсу, жұмыс берушінің өз жеке кабинетінде қандай да бір азаматты жұмысқа алғаны туралы хабарлауы арқылы, сондай-ақ, портал жұмысқа орналасуға көмектесті ме деген сұраққа жұмыс іздеушінің берген жауабын тіркеу арқылы біліп отырамыз.

- «Еңбек дағдыларын дамыту және жұмыс орындарын ынталандыру» жобасының электрондық еңбек биржасына қосып отырған үлесі қандай?

- Жоба аясында Халықты жұмыспен қамту орталықтарын реформалау басталды. Бұл реформа қызметтер сапасын көтеруге және де жұмыс берушілермен ынтымақтастықты нығайтуға бағытталған. Жобаның басты құрамдас бөлігі Ұлттық біліктіліктер жүйесі үшін негіз қалыптастыруды көздейді. Қазақстан Республикасының Ұлттық қызметтер жіктеуіші осындай негізге айналып отыр. «Еңбек ресурстарын дамыту орталығы» АҚ мамандары дайындаған бұл жіктеуіш қазірдің өзінде Электрондық еңбек биржасына ендіріліп қойылған.