Қазақстанның жұмыс берушілеріне күзетшілер қажет

Қазақстанда 2019 жылдың бірінші жартыжылдығында электрондық еңбек биржасында түйіндемелер мен бос жұмыс орындары санының арақатынасы бойынша ең тапшы мамандықтардың тізімін күзетшілер бастап тұр.

Еңбек ресурстарын дамыту орталығының сарапшылары атап өткендей, үстіміздегі жылдың 6 айының қорытындысы бойынша  еңбек нарығында 4,4 мыңнан астам күзетші бос лауазымына сұраныс жоқ болып қалды. Тапшы мамандықтар бестігіне санитарлар (2,6 мыңнан астам бос жұмыс орны), тазалаушылар (2,3 мың), даяшылар (2,2 мың) және жүк тиеушілер (2,1 мың) кірді.

Ең сұранысқа ие мамандықтардың ондығына жол салушылар, балабақшалардың тәрбиешілері, мейіргерлер, такси жүргізушілері мен промоутерлер енеді.

Айта кететін жайт, республика өңірлерінде еңбек нарығындағы сұраныс айтарлықтай ерекшеленеді. Мәселен, Шымкентте тазалаушылар (300-ден астам бос жұмыс орны) ең көп сұранысқа ие, Алматыда такси жүргізушілерінің жетіспеушілігі байқалады (2 мыңнан астам бос жұмыс орны), Нұр-Сұлтанда күзетшілер жетіспейді (1,1 мың бос жұмыс орны).

2019 жылдың бірінші жартыжылдығындағы электрондық еңбек биржасында жұмыс күшінің сұранысы мен ұсыныстарының талдауымен толығырақ мына сайттан танысуға болады.