АӘК-ке өтініш берушілер ұсынған құжаттар тіркеуге алынады

Тиісті өзгерістер Мемлекеттік атаулы әлеуметтік көмек тағайындау және төлеу ережелеріне енгізілді (бұдан әрі – АӘК). Қазақстанның барлық өңірлеріндегі халықты жұмыспен қамту орталықтары мен жұмыспен қамту және әлеуметтік бағдарламалар бөлімдерінің мамандарына арналған жаңа өзгертулер Еңбек ресурстарын дамыту орталығында (бұдан әрі – ЕРДО) кеңінен түсіндірілуде.

ЕРДО алаңында бейнеконференция арқылы оқу семинарлары басталды. Шара 18 қыркүйекке дейін жалғасады. Алғашқы тыңдаушылар Жамбыл және Ақтөбе облыстары халықты жұмыспен қамту орталықтарының қызметкерлері.

«Атаулы әлеуметтік көмек мемлекеттік органдардың ақпараттық жүйелерінен алынған электрондық құжаттар негізінде тағайындалады. Алайда, мемлекеттік органдардың көптеген деректері тек 2008 жылдан бастап цифрланды. Бұл алимент бойынша балаға берешек, бала асырап алу туралы ақпарат, бала туу және тағы басқаларға қатысты. Егер ақпараттық жүйеде деректер болмаса, халықты жұмыспен қамту орталығының қызметкері сұрау жібереді, оған жауап 30 күн ішінде беріледі. Енді АӘК үміткерлері атаулы көмек алу үшін растайтын құжаттарды өздері ұсына алады», – деді «Еңбек ресурстарын дамыту орталығы» АҚ вице-президенті Анархан Дүйсенова.

Сонымен қатар, ол халықты жұмыспен қамту орталықтары кейбір азаматтардың АӘК тағайындау үшін әдейі уақытша тіркеуге тұру фактілеріне тап болғандығын атап өтті. Енді АӘК-ке үміткер кем дегенде 6 айға тұрақты немесе уақытша тіркеуді ұсынуы қажет.

«ҚР Президенті Қасым-Жомарт Тоқаев Қазақстан халқына Жолдауында азаматтарды әлеуметтік қолдау шараларына ерекше назар аударды. Үкіметке атаулы әлеуметтік көмек көрсету тетігін түзету тапсырылды. Ол –  ашық, әділетті және жұмысқа ынталандыратын механизм болуы тиіс. Қазір осы мәселелермен Еңбек және халықты әлеуметтік қорғау министрлігі айналысуда», – деді «Еңбек ресурстарын дамыту орталығы» АҚ вице-президенті Анархан Дүйсенова.

10.09.2019
24