Қазақстанда 2019 жылдың соңына дейін 3 мың мамандық бойынша қажетті дағдылар сипатталады

Қазақстанда 693 кәсіпті қамтитын 98 кәсіптік стандарт (бұдан әрі – КС) бекітілді, ал әзірленетін 480 КС ескере отырып, 2019 жылдың соңына дейін Қазақстанда 3 мыңнан астам мамандық бойынша қажетті білім мен машықтардың сипаттамасы қалыптастырылатын болады.

Кәсіптік стандарттарды әзірлеу ұлттық біліктілік жүйесін дамыту шеңберінде жүргізіледі. Осы процесті үйлестіруді, әдіснамалық қолдауды және бақылауды «Еңбек ресурстарын дамыту орталығы» АҚ (бұдан әрі – ЕРДО) базасында ҚР Еңбек және халықты әлеуметтік қорғау министрлігі құрған жобалау офисі жүзеге асырады.

«Қазіргі уақытта 36 салалық біліктілік шеңбері мен 480 КС әзірлеу және бекіту жұмыстары жүргізілуде, оны 2019 жылдың соңына дейін аяқтау жоспарланған. Бүгінгі таңда Қазақстанда 693 мамандықты қамтитын 98 кәсіптік стандарт бекітілді, ал 2019 жылдың соңына дейін әзірленіп жатқан 480 КС ескеріле отырып, Қазақстанда 3 мыңнан астам мамандық бойынша қажетті білім мен машықтардың сипаттамасы қалыптастырылатын болады. Бұл ретте, әзірленетін кәсіптік стандарттардың санына ғана емес, сапасына да көп көңіл бөлінеді. Әдістемелік қолдау көрсету және кәсіптік стандарттардың сапасын бақылауды жүзеге асыру үшін «Ernst & Young» халықаралық консалтинг компаниясы тартылды», – деді ЕРДО вице-президенті Ерасыл Жұманбаев.

Ол КС әзірлеу жұмыс берушілердің және қазіргі заманғы еңбек нарығының өзекті талаптарына сәйкес келетін білікті кадрларды дайындау үшін өте маңызды екенін атап өтті. Алайда, кәсіптік стандарт шын мәнінде жұмыс істейтін құралға айналуы үшін әртүрлі жұмыс берушілерді, сарапшыларды, білім беру мекемелерін және саланың басқа да өкілдерін тарта отырып, оны сапалы әзірлеуді ғана емес, сонымен қатар оны білім беру, кадрлар даярлау және қызметкерлердің біліктілігін тану жүйесімен одан әрі интеграциялауды қамтамасыз еткен маңызды.

«Кәсіптік стандарттар жұмыс берушілер мен саланың басқа да өкілдерінің білім беру мекемелеріне сұранысы болып табылады және оларда жұмыскердің белгілі бір кәсіп бойынша нені білуге және не істей алуға тиіс екені сипатталады. Осындай сұранысты алғаннан кейін білім беру мекемелеріне студенттерді не үшін және қалай дайындау керектігін түсіну оңайға түседі», - деді Жұманбаев.

КС әзірленетін әрбір сала бойынша білім беру мекемелері мен жұмыс берушілердің пулы құрылады, оларды білім беру бағдарламаларын әзірлеу және лауазымдық нұсқаулықтарды қалыптастыру үшін бекітілгеннен кейін қолданатын болады.

«Қазіргі таңда жобалық офис базасында кәсіптік стандарттарды келісу және бекіту кезеңінде апта сайын салалық мемлекеттік органдардың, ҚР Білім және ғылым министрлігінің, салалық қауымдастықтардың және «Атамекен» ҚР Ұлттық Кәсіпкерлер палатасының өкілдерімен кездесулер өткізіледі», – деп хабарлады ЕРДО вице-президенті.