ЕРДО мамандары әлеуметтік-еңбек саласы үшін жаңа ақпараттық жүйені әзірледі
Еңбек ресурстарын дамыту орталығының (бұдан әрі – ЕРДО) қызметкерлері «Әлеуметтік-еңбек саласындағы ахуал орталығы» ақпараттық жүйесін әзірледі, ол Қазақстанның әлеуметтік-еңбек саласының негізгі көрсеткіштерін мониторингтеу мен талдауға мүмкіндік береді.
Бұл ақпараттық жүйе ҚР Еңбек және халықты әлеуметтік қорғау министрлігінің (бұдан әрі – Еңбекмині) мамандары мен белгілі бір индикаторлар бойынша жауапты өңірлік мемлекеттік органдардың өкілдері үшін барлық қажетті деректерге қол жеткізуді жеңілдетеді.
Жыл соңына дейін ахуал орталығында нақты уақытта 6 негізгі бағыт бойынша: әлеуметтік қамсыздандыру және әлеуметтік сақтандыру, мүгедектік және әлеуметтік қызметтер, әлеуметтік көмек, еңбек блогы, жұмыспен қамту және көші-қон сияқты Еңбекминінің барлық негізгі ақпараттық жүйелерінен деректер өңделетін болады. Зейнеткерлер мен мүгедектер саны сияқты үлкен көрсеткіштер күнделікті негізде, басқалары – әрбір 15 минут сайын өзектендірілетін болады.
«Бұл жүйе ақпараттық жүйелерде қолжетімді барлық деректерді жинайды, талдайды және жаңартады, олардың негізінде өңірлер бойынша да, тұтастай ел бойынша да есептер мен көрсеткіштер қалыптастырылады. Ахуал орталығы әлеуметтік қолдау шаралары көрсетілген адамдардың санын көруге, жұмыссыздар мен жұмысқа орналасқандардың санын анықтауға мүмкіндік береді. Біз адамдардың жұмысқа орналасқанын, зейнетақы және әлеуметтік аударымдардың басталғанын көре аламыз», – деді ЕРДО Деректерді талдау және өңдеу департаментінің директоры Бахтияр Жазықпаев.
Есеп беру үшін ақпарат алуды жеңілдетумен қатар, ахуал орталығы Еңбекминінің қызметкерлеріне өңірлердегі проблемаларды онлайн режимде анықтауға мүмкіндік береді.
«Белгіленген критерийлерге сәйкес қазіргі жағдайды әр түрлі түстермен көрсететін интерактивті карта құрылды. Жасыл – жақсы, сары – қалыпты, қызыл – проблема. Мәселен, егер өңірдегі жұмыссыздар саны белгілі бір пайыздан немесе саннан асып кетсе, онда бұл қиын жағдай. Біз бұл сүзгілерді мәліметтер базасында реттейміз», – деп бөлісті ЕРДО Деректерді талдау және өңдеу департаментінің директоры.
Бұл ақпараттық жүйені пайдалану қажетті шешімдерді тез қабылдауға мүмкіндік береді. Мәселен, жұмыспен қамтуды қолдау шаралары шеңберіндегі тыңдаушылар санын және оқудан кейін қоныс аударғандардың санын талдай отырып, Еңбекминінің мамандары тиімділік дәрежесін анықтай алады.
Жақын арада ЕРДО ахуал орталығы функционалына СМС-хабарлама және электрондық пошта арқылы хабарлама қосуды жоспарлап отыр. Мәселен, қандай да бір өңір «қызыл» зонаға түскен жағдайда, өңірдегі жауапты адамдар және/немесе жетекшілік ететін вице-министр бұл туралы жүйе ақпараттың соңғы жаңаруын талдап болғаннан кейін біле алатын болады.
Жыл соңына дейін Еңбекмині мамандары әлеуметтік-еңбек саласының ахуал орталығын пайдаланады, олар ақпараттық жүйеге интеграцияны қажет ететін өзгерістер мен қосымша индикаторлар туралы есеп береді. Бұдан әрі жүйеге және жергілікті атқарушы органдарға өңір әкімдері мен әкім орынбасарлары деңгейінде қол жетімділікті ашу жоспарлануда.
Жалпы, дамыған ахуал орталығының әлеуеті ақпараттық жүйелерді тек әлеуметтік және еңбек салаларында ғана емес, сонымен қатар басқа да салаларда қамтуға мүмкіндік береді.
