Жұмыспен қамту орталықтарының басшыларына қызметтерін әрі қарай дамыту бойынша ұсыныстар берілді

Қазақстан астанасында «Халықты жұмыспен қамту орталықтарының қызметін реформалау – 2019 жылдың қорытындысы» тақырыбында семинар-кеңес өтті, оның барысында «Еңбек ресурстарын дамыту орталығы» АҚ (бұдан әрі – ЕРДО) сарапшылары мемлекеттік Жұмыспен қамту қызметтерінің қызметкерлерімен халықты жұмыспен қамту орталықтарын (бұдан әрі – ЖҚО) реформалаудың кезекті кезеңінің қорытындысын талқылады және оларды одан әрі дамыту жөнінде ұсыныстар берді.

Іс-шараға ЕРДО қызметкерлері, өңірлердің Жұмыспен қамтуды үйлестіру және әлеуметтік бағдарламалар басқармалары басшыларының орынбасарлары және қалалар мен аудандардың жұмыспен қамту орталықтарының басшылары қатысты.

«Бүгінде Қазақстанда 203 Жұмыспен қамту орталығы жұмыс істейді. Елбасының тапсырмасы бойынша олардың қызметін трансформациялау 2018 жылдан бастап жүргізіліп келеді. Осының нәтижесінде қызмет көрсету сапасы мен жұмыссыздардың еңбек нарығына бейімделуінің тиімділігі артуда», – деп атап өтті ЕРДО вице-президенті Ербол Оспанов.

Семинар-кеңеске қатысушылар 2019 жылғы 9 ай ішіндегі ЖҚО қызметінің қорытындыларын: жұмыссыздарға еңбек делдалдығын көрсету, жұмыс берушілермен бос жұмыс орындарын тіркеу және кадрларды іріктеу бойынша өзара іс-қимыл, халықты жұмыспен қамту саласында аутсорсинг қызметтерін көрсету, электрондық үкімет порталы арқылы мемлекеттік қызметтерді көрсету сияқты әртүрлі бағыттар бойынша талқылады.

ЕРДО Жұмыспен қамту қызметін дамыту департаментінің директоры Ирина Рубашина Жұмыспен қамту орталығын одан әрі дамыту бойынша өз ұсыныстарын айтты. Ол жалақысы жоғары бос жұмыс орындарына баса назар аудара отырып, жұмыс берушілер мен бос жұмыс орындар базасын кеңейту қажеттігін айтты.

«Жұмыс берушілермен мақсатты жұмыс жүргізіп, олардың қажеттіліктерін кадрлармен анықтап, тиісті мамандарды тауып, оларды жұмысқа орналастыруға ықпал ететін белсенді шараларға тарту керек», – деп түйіндеді Ирина Рубашина.

Есеп беру кезеңінің нәтижелерін талқылағаннан кейін іс-шараның қатысушылары 2020 жылғы 1 қаңтардан бастап күшіне енетін атаулы әлеуметтік көмек көрсетудің жаңа тетіктерімен танысты, сондай-ақ ЕРДО қызметкерлерінен Еңбек нарығының ақпараттық жүйесімен жұмыс істеу туралы сұрақтарға жауап алды.

25.11.2019
1243