26 наурыздан бастап мүмкіндіктері шектеулі жандарға арналған бес қызмет проактивті форматқа өтеді

«Еңбек ресурстарын дамыту орталығы» АҚ (бұдан әрі – ЕРДО) мүмкіндіктері шектеулі адамдарға қызмет көрсетумен байланысты қағаз құжат айналымының бір бөлігін электрондық форматқа ауыстыру бойынша жұмысын бастады. Наурыз айында 5 қызмет пилоттық режимде жұмыс істей бастайды, тағы 4 қызмет жақын арада іске қосылады.

Мүмкіндіктері шектеулі адамдар үшін әлеуметтік қызметтердің проактивті форматқа көшуі Қазақстан Республикасының Тұңғыш Президенті – Нұрсұлтан Назарбаевтың 2018 жылғы 5 қазандағы Жолдауын, сондай-ақ Мемлекет басшысы Қасым-Жомарт Тоқаевтың 2020 жылғы 4 наурыздағы «Цифрлық Қазақстан» мемлекеттік бағдарламасын іске асыру жөніндегі тапсырмасын орындау шеңберінде жүргізіледі.

«2020 жылдың 26 наурызынан бастап үйден шықпай-ақ , мүмкіндіктері шектеулі адамдар SMS-хабарлама арқылы протездік-ортопедиялық көмек алу, жеке көмекшінің (жүріп-тұруы қиын бірінші топтағы мүгедектер үшін) және ымдау тілі маманының (есту кемістігі бар мүгедектер үшін) қызметтерін алу үшін құжаттарды ресімдей алады. Сонымен қатар, оларға                                      сурдо-тифлотехникалық және міндетті гигиеналық құралдар алуға,                      санаторлық-курорттық емделуге құжаттар ресімдеуге және кресло-арбаларды проактивті алуға болады», – деп хабарлады АЖ дамыту және сүйемелдеу департаментінің директоры Серік Тоғызбай.

Сондай-ақ 4 қызметті іске қосу бойынша жұмыс жүргізілуде. Олар: медициналық-әлеуметтік мекемелерде арнаулы әлеуметтік қызмет көрсетуге және үйде күтім жасау жағдайында арнаулы әлеуметтік қызмет көрсетуге құжаттар ресімдеу, жергілікті өкілді органдардың шешімі бойынша мүгедектерге және әлеуметтік маңызы бар аурулары бар адамдарға әлеуметтік көмек тағайындау, сондай-ақ мүгедек балаларды үйде оқытуға жұмсалған шығындарды өтеу.

Естеріңізге сала кетейік, 2020 жылдың 1 қаңтарынан бастап пилоттық режимде Әлеуметтік қызметтер порталы іске қосылды, онда жеке бейімдеуді талап етпейтін техникалық оңалту құралдары (бұдан әріи – ТОҚ) түрлерінің жартысынан астамын қамтамасыз ететін, әлеуметтік қызмет көрсету бойынша  5 бизнес-процестің 2-еуі жүзеге асырылуы мүмкін. Жеке іріктеуді талап ететін ТОҚ-тың қалған түрлері, сондай-ақ қалған бизнес-процестер 2020 жылдың бірінші жартыжылдығында пысықталатын болады.

Өтпелі кезеңде үздіксіз қамтамасыз ету үшін ағымдағы жылы оңалту тауарлары мен қызметтері Портал арқылы да, мемлекеттік сатып алу арқылы да ұсынылатын болады. 2021 жылдан Әлеуметтік қызметтер порталына толық көшу басталады деп күтілуде.

20.03.2020
52