ЭЕБ дағдыларының банкі жұмыс берушілердің қажеттіліктеріне сәйкес жаңартылады

«Еңбек ресурстарын дамыту орталығы» АҚ (бұдан әрі – ЕРДО) сарапшылары жаңа кәсіптік стандарттарды негізге ала отырып, электрондық еңбек биржасының (бұдан әрі – ЭЕБ) Дағдылар банкін жаңартты. Өзгерістер 37 бағыт бойынша экономикалық қызмет түрлерінің 18 жалпы жіктеуішіне қатысты болды.

«Қазақстанда ұлттық біліктілік жүйесі белсенді дамып келеді, оның құрамдас бөлігі кәсіптік стандарттар болып табылады. Тек өткен жылы жұмыс берушілер жұмыс топтары құрамында 480 кәсіптік стандартты әзірлеп, жаңартты. Олардың негізінде ЭЕБ-да орналастырылған Дағдылар банкі қалыптастырылды және өзектілендірілді», – деді ЕРДО Мамандықтар атласын сүйемелдеу басқармасының басшысы Ольга Киселева.

Дағдылар банкі жұмыс іздеп жүрген адамдарға түйіндемені, ал жұмыс берушілерге – қызметкерлердің біліктілігіне қойылатын талаптарды қалыптастыру ісін біршама жеңілдетуге мүмкіндік береді.

Бұған дейін жұмыс берушілер мен Дағдылар банкін пайдаланушылардан кейбір кәсіптерге қойылатын талаптар тізімдеріне, оларда көрсетілген дағдылардың сәйкес келмеуі туралы наразылықтар келіп түсті. Бұл маман іздестіру ісін едәуір қиындатқан және жұмыс берушілердің нақты талаптарын көрсетпеуі мүмкін.

Қазіргі уақытта жаңа Дағдылар банкінде көптеген кәсіптерді тиімді сипаттайтын 7 793 кәсіби және 325 жеке дағдылар мен қасиеттер бар.

Дағдылар банкін одан әрі жаңарту жаңа кәсіптер мен құзыреттіліктердің атласы, сондай-ақ жаңа бос орындар тізімі бойынша пайдаланушылардың сұраныстары есебінен жүзеге асырылатын болады.

21.03.2020
11