WDC: Білікті қызметкерлерге деген сұраныс ұсыныстан 1,6 есе асып түседі
Алматы, Нұр-Сұлтан қаласы және солтүстік облыстарда жұмыс берушілер үшін білікті қызметкерлердің жетіспеушілігі сезілсе, ал батыс және оңтүстік өңірлерде керісінше олардың көптігі байқалады
WDC (ҚР Еңбек Министрлігі жанындағы Еңбек ресурстарын дамыту орталығы) мамандары «2020 жылдың екінші тоқсанындағы Қазақстандағы білікті еңбекке деген ұсыныс пен сұранысқа талдау» атты шолуын дайындады. Құжатта өңірлер мен кәсіби топтар бойынша бос орындар серпініне және түйіндемелерге жіті талдау жасалған.
Ағымдағы жылдың ІІ-ші тоқсанында Электрондық еңбек биржасында білікті еңбек саласы бойынша 163 мың бос жұмыс орны орналастырылды (сәуірде ең аз бос жұмыс орны орналастырылды – шамамен 25 мың, бұл елдегі енгізілген төтенше жағдайға байланысты). Осы кезеңде білікті ізденушілер ЭЕБ-ға 106 мыңға жуық түйіндеме (резюме) орналастырды.
Екінші тоқсанда білікті қызметкерлерге деген жоғары қажеттілік Алматыда (22,5 мың бос орын) және Нұр-Сұлтанда (16 мың), сондай-ақ Қарағанды (17,4 мың) және Қостанай (16,6 мың) облыстарында тіркелді.
Оңтүстік аймақтарда түйіндеме санының ұсынылған бос жұмыс орындарының санынан басым түсуі байқалады. Түркістан облысында 100 бос орынға – 164 түйіндеме, Жамбыл облысында – 139 түйіндеме, Қызылорда облысында – 126 түйіндемеден келіп отыр. Екі батыс облыстарында, атап айтқанда Атырау және Маңғыстау облыстарында жұмыс іздеушілер бос орындарға қарағанда көбірек түйіндеме орналастырды.
Айта кету керек, біліктілігі жоғары және тәжірибелі қызметкерлерді құрылыс, көлік және өнеркәсіптік кәсіпорындар жиі іздейді.
Ауыл және орман шаруашылығы, сондай-ақ балық шаруашылығы мен балық аулау саласында жұмыс берушілер де, жұмыс іздеушілер де аз. Мәселен, ЭЕБ-да барлығы 1,8 мың бос орын және 1,2 мың резюме тіркелген.
Басшыларға және мемлекеттік қызметкерлерге арналған ұсыныстардың саны нарықта әлдеқайда аз болды: 100 бос орынға 249 түйіндеме.
WDC талдамалық шолуының толық нұсқасымен мына сілтеме https://clck.ru/PeWmQ бойынша таныса аласыздар.
